फिल्म ’महाभोज’ को नयाँ प्रदर्शन मिती यही जेठ ३० गतेलाई तय गरिएको छ । राजनीतिक आन्दोलनका कारण दिनेश राउत निर्देशित फिल्म रिलिजको मुख जेठ १५ गते लाई स्थगन गरिएको थियो । अब यो मल्टिस्टारर फिल्म जेठको अन्तिम साताबाट प्रदर्शनमा आउने भएको हो ।
निर्देशकले भने, “हामीले धेरै मिहिनेतका साथ तयार पारेको चलचित्र ’महाभोज’ केही विशेष परिस्थितिका कारणले निर्धारित मितिमा रिलिज गर्न सकेनौँ । दर्शकहरूप्रति यसबाट असहजता सिर्जना भएकोमा हामी क्षमा प्रार्थी छौँ ।“
उनले थप भने, “अब चलचित्र जेठ ३० गते रिलिज हुँदैछ । यो हाम्रो समाजको कथा हो, तपाईँहरूको साथ र मायाले मात्र हामी सफल हुन्छौँ । त्यसैले यही मितिमा नजिकको हलमा ’महाभोज’ हेर्न नबिर्सिनु होला ।“
केही दिनअघि यो चलचित्रको काठमाडौंमा प्रिभ्यु शो आयोजना भएको थियो, जहाँ चलचित्र हेरेका दर्शकहरूले व्यापक सकारात्मक प्रतिक्रिया दिएका थिए । यसमा सहकारी पीडितको कथा मात्र नभएर अत्यन्तै मनोरञ्जक समेत रहेको प्रतिक्रिया उक्त शोबाट प्राप्त भएको थियो ।
फिल्म ’महाभोज’ मा समावेश कथा, प्रस्तुति शैली र कलाकारहरूको अभिनयले दर्शकमा चासो पैदा गरिरहेको छ। यस चलचित्रमा दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल, मोहन निरौला लगायतका प्रमुख अभिनय रहेको छ ।
https://www.youtube.com/watch?v=5x7LLqIk0jw&t=8s
क्लक वर्क क्रियसन र पिक्चर फ्रेमको प्रस्तुतिमा बनेको यस चलचित्रका निर्माता हिमाल कडरिया हुन् ।
