यही श्रावण १६ गतेदेखि देशव्यापी प्रदर्शनमा आउने फिल्म ‘रियाल रिङ्गेट’ ले प्रचार प्रचार गरिरहेको छ । हाल काठमाडौं उपत्यका भित्रका विभिन्न क्याम्पसहरूमा पुगेर फरक शैलीमा प्रचार अभियान सञ्चालन गरिरहेको छ।
क्याम्पस क्याम्पसमा भइरहेको यो प्रचारमा फिल्मका निर्देशक विभोर पोखरेल, चर्चित गायक रामचन्द्र काफ्ले, लोकप्रिय कवि नाथन रायन, कलाकारहरू प्रमोद चौलागाईं, सीमा केसी, सन्दीप तामाङ, सुवास थापा मगर, विशाल थापा लगायतको सक्रिय सहभागिता रहेको छ। उनीहरू हालसम्म विनायक सिद्ध कलेज, द इनसाइट भिजन एसएस कलेज, साइपाल एकेडेमी लगायतका शिक्षण संस्थामा पुगेका छन्।

यो प्रचार अभियानको विशेषता भनेको कविता र गीतको संयोजन हो । कवि रायनले आफ्नै लेखनका मार्मिक कविताहरू प्रस्तुत गर्दा गायक काफ्लेले त्यसमा सङ्गीत र स्वरको स्पर्श थपेर विद्यार्थीहरूलाई भावनात्मक रूपमा छोइरहेका छन्। विद्यार्थीसँग प्रत्यक्ष संवाद, कविता वाचन र गीत मार्फत फिल्मको सन्देशलाई प्रभावकारी रूपमा प्रस्तुत गरिँदैछ । कवि रायनले फिल्म ‘रियाल रिङ्गेट’ का लागि विशेष कविता रचना तथा वाचनसमेत गरेका छन्, जुन चलचित्रमा पनि समावेश छ। नेपाली चलचित्रमा कमै मात्र प्रयोग हुने कविता विधालाई यस चलचित्रले विशेष प्राथमिकता दिएको देखिन्छ।
फिल्मले वैदेशिक रोजगारीमा गएका नेपाली युवाहरूले भोग्नुपरेका सङ्घर्ष र पीडाको चित्रण गर्नेछ । निर्देशक विभोर पोखरेलका अनुसार, चलचित्रले नेपाली श्रमिकहरूको वास्तविक कथा बोल्ने प्रयास गरेको छ। चलचित्रको नाम ‘रियाल रिङ्गेट’ नै कतार, साउदी अरब र मलेसिया जस्ता नेपालीका प्रमुख श्रम गन्तव्य राष्ट्रहरूलाई सङ्केत गर्छ।
फिल्ममा प्रमोद चौलागाईं, निता ढुङ्गाना, छुल्ठिम डोल्मा गुरुङ, रवीन्द्र खड्का, ध्रुव कोइराला लगायतका कलाकारको अभिनय छ भने सङ्गीतमा रामचन्द्र काफ्ले, किरण तुलाधर र चन्दन ध्वज केसीको योगदान रहेको छ ।