काठमाडौैं । नेपालका हलमा प्रदर्शन भैरहेको फिल्म ‘गौंथली’ शुक्रबारदेखि अमेरिकामा रिलिज हुने भएको छ । वितरण कम्पनी सेभेन सिज इन्टरनेसनलले विज्ञप्ति जारी गर्दै २४ जुलाईदेखि अमेरिकाभर प्रदर्शन हुन लागेको जनाएको हो ।
प्रदर्शनअघि बिहीबार तीन सहरमा प्रिभ्यू शोज (अमेरिका प्रिमियर) राखिएको छ । डलासको फोर्ट वर्थ, टेक्सासको सिनेपोलिस लक्जरी सिनेमाज र ह्यारिसबर्ग, पेन्सिलभेनियाको रिगल थिएटर र कोलम्बस, ओहायोको मार्कस थिएटरमा दर्शकले फिल्म हेर्न पाउनेछन् ।
अमेरिकामा रहेका नेपाली दर्शकको मागलाई ध्यान दिँदै २६ राज्यका ५६ सहरमा पहिलो सातामै १ हजारभन्दा धेरै शोसहित प्रदर्शनमा ल्याउन लागिएको उल्लेख छ ।
शुक्रबारदेखि भने २६ राज्यमा फिल्म लाग्दैछ । टेक्सासका ९ हलमा, ओहायोका ७, क्यालिफोर्नियाका ४, न्युयोर्कका ४, आयोवाका ३, पेन्सिलभेनियाका ३ हलमा फिल्म रिलिज हुनेछन् । एरिजोनाका, कोलोराडो, केन्टकी, मिजौरी, भर्जिनिया र वासिङ्टन डीसीका २/२ हलमा फिल्म लाग्नेछ ।
शिक्षा, महिला सशक्तीकरण र एक संवेदनशील प्रेम कथालाई केन्द्रमा राखिएको फिल्ममा वरिष्ठ चिकित्सक भोला रिजालको कथा र उनकी पत्नी सरला रिजालको वास्तविक जीवन संघर्षबाट प्रेरित छ ।
सानै उमेरमा विवाह भए पनि पढाइप्रतिको दृढ संकल्प नछाड्ने ग्रामीण युवती (सिम्रन खड्का) र अटिजम स्पेक्ट्रममा रहेका युवक (अरुण क्षेत्री) बीचको भावनात्मक सम्बन्ध र वैवाहिक यात्रालाई चलचित्रमा निकै मार्मिक ढङ्गले प्रस्तुत गरिएको छ ।
अलास्का, जर्जिया, इलिनोइस, मेरिल्यान्ड, नेब्रास्का, नेभाडा, नर्थ क्यारोलाइना, नर्थ डकोटा, ओक्लाहोमा, ओरेगन, साउथ डकोटा, टेनेसी, युटाह र विस्कन्सिनका एक-एक हलमा फिल्म नियमित प्रदर्शन हुने उल्लेख छ ।
कपिल रिजाल निर्देशित फिल्ममा अरुण क्षेत्री र सिम्रन खड्काको शीर्ष भूमिका छ । मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, संजोग रसाइली, सीतादेवी तिमल्सिना, लक्ष्मीनाथ तिमल्सिना, राजेन्द्र नेपाली, अंशु ओली र प्रिन्स नेपालीको पनि अभिनय छ ।
वितरण कम्पनी सेभेन सिज इन्टरनेसनलको वेबसाइट र सामाजिक संजाल पृष्ठबाट समेत टिकट लिन सकिने जनाइएको छ ।
