मधेश प्रदेशले दोस्रोपटक ‘मिस नेपाल’ प्राप्त गरेको छ । निकिता चाण्डक ‘मिस नेपाल वर्ल्ड’ बनेको केही वर्षपछि आर्या निशान्त गतसाता ‘मिस नेपाल इन्टरनेसनल २०२६’ घोषित भएकी छन् ।
अनलाइनखबरसँग कुरा गर्दै उनले ‘मिस नेपाल’को ताज जितेपछि आफ्नो टाउकोमा उत्तरदायित्वको भार थपिएको बताइन् । आफूमाथि मुलुकको प्रतिष्ठालाई अन्तर्राष्ट्रिय मञ्चमा ऊँचो बनाउन जिम्मेवारी बढेको उनी बताउँछिन् ।
मृदुभाषी र मिजासिलो स्वभावकी आर्या फेसन मोडल र शैक्षिक अभियन्ता हुन् । २५ नोेभेम्बरमा जापानमा आयोजना हुने ‘मिस इन्टरनेसनल’को अन्तर्राष्ट्रिय प्रतिस्पर्धामा उनले मुलुकको प्रतिनिधित्व गर्नेछिन् ।
आफू उत्कृष्ट दिन आफू प्रतिस्पर्धामा उत्रिएको उनको भनाइ छ । ‘म तुलना नगरिकन आफ्नो बेस्ट दिने र अपेक्षा नगर्ने भनेर गएकी हुँ । यो भाग्यको कुरा हो । मैले रिजल्टमा फोकस गरिन । नजितेपनि दुःखी मनले फर्किन्नथे । जितेकोमा खुसी छु’ उनी भन्छिन् ।
‘ताज मेरो टाउकोमा आएपछि एकछिन त सपनामै छु कि जस्तो लाग्यो’ उनले भनिन्, ‘ठूलो दायित्व थपिएको महसुस गरेँ । म अन्तर्राष्ट्रिय मञ्चमा नेपाल भनेर चिनिनेछु । त्यसमा गर्व पनि हुन्छ र ठूलो भार पनि हो ।’
‘मिस नेपाल ‘बनेपछि सुन्ने र हेर्न चाहने दर्शकको आयाम बढ्ने उनको बुझाइ छ । उपाधि जितेपनि आफ्नो व्यक्तिगत स्वभावमा कुनै फेरबदल नआउने उनको भनाइ छ तर, मुलुकलाई प्रतिनिधित्व गर्ने दायित्व थपिएको उनी बताउँछिन् ।
जापानमा हुने ‘मिस इन्टरनेनसल’को मञ्चमा आफूले नेपाललाई सगरमाथा र बुद्धको मात्र देश नभएर यहाँको मूल्यलाई बुझाउने प्रयास गर्ने बताइन् । ‘नेपाललाई सगरमाथा, बुद्धको देश मात्र होइन, नेपाली हामी मिलनसार छौं, अतिथिलाई भगवान मान्छौं, गोरखाको देश पनि हो भन्ने कुरा बुझाउन चाहन्छु’ भन्छिन्, ‘म आफ्नो व्यक्तित्वमा पनि ती भ्यालु देखाउने प्रयास गर्नेछु ।’
अडिसन दिँदादेखि ताज जित्दासम्मको यात्रामा आफूले सिकेको सबैभन्दा ठूलो कुरा हार नमान्नु रहेको उनको बुझाइ छ । ‘कहिलेकाहिँ जीवनमा चुनौती धेरै हुन्छ । गल्ती भएमा, बिग्रिएमा आफ्नो मन दुखाउनु हुँदैन । हरेक दिन उठ्नूस र आफ्नो उत्कृष्टता दिने प्रयास गर्नूस’ उनको सुझाव छ ।
‘मिस नेपाल’को ताज हीराले भरिएको मात्र ताज नभएको बरु सबै नेपालीको अपेक्षा यसमा जोडिएको उनको भनाइ छ । ‘यो हीराले भरिएको ताज मात्र होइन कि सबै नेपालीको अपेक्षा यसमा हुनेछ । अन्तर्राष्ट्रिय मंचमा जाँदा सबैलाई चित्त बुझाउने गरि प्रतिनिधित्व गर्नुपर्नेछ’ उनी भन्छिन् ।
निकिता चाण्डक, श्रृंखला खतिवडा लगायतका पूर्व नेपालको कामबाट आफू प्रभावित भएको उनी बताउँछिन् । ‘उहाँहरूले जति माया पाउनुभयो र अन्तर्राष्ट्रिय प्लाटफर्ममा नाम फैलाउनुभयो, उहाँहरूको यात्राले मलाई प्रेरणा दिएको छ’ उनी भन्छिन् ।
उनले मिस इन्टरनेसनलको प्रतिस्पर्धामा संयुक्त राष्ट्रसंघले निर्धारण गरेका १७ वटा सह्रसाब्दी विकास लक्ष्यअन्तर्गत गुणस्तरीय शिक्षाको एजेन्डा उठाउने बताउँछिन् । अन्त्यमा उनले अहिलेको युवा पुस्तालाई सुझाव दिइन्- आफ्नो जीवनको रेखा आफै कोर्नुस, अवसरलाई क्यास गर्नूस, हार नमान्नू, सपना पूरा हुन्छ ।’
