विदेशी फिल्मको प्रभाव घटाउन आगामी पुस्ताले पनि निरन्तर मेहनत गर्नुपर्ने उप्रेती बताउँछन् । यसका लागि नेपाली दर्शकले आफ्ना फिल्मप्रति माया र विश्वास देखाउनुपर्ने उनको भनाइ छ ।
विदेशी फिल्म हेर्ने दर्शकलाई रोक्नुभन्दा त्यही स्तरको प्रविधि, प्रस्तुति र विषयवस्तु नेपाली फिल्ममार्फत दिन सके बिस्तारै विदेशी फिल्मको प्रभाव घटाउन सकिने उनको धारणा छ ।
खुला बजारमा विदेशी फिल्मलाई रोक्नुभन्दा नेपाली फिल्मलाई तिनीसँग प्रतिस्पर्धा गर्न सक्ने बनाउनुपर्ने उनले बताए ।
‘हाम्रो देशमा खुला बजार छ । विश्वभरिका फिल्म हामीकहाँ आउँछन् । धेरै महँगा फिल्म आउँछन् र ती हेर्ने स्वतन्त्रता पनि दर्शकलाई छ,’ निखिलले भने, ‘तर हामी गरिब छौँ भनेर मेहनतमा गरिब नहोऔँ ।’
विमानस्थल, सडक, रंगशालालगायत सार्वजनिक तथा संवेदनशील स्थानमा फिल्म छायांकनका लागि अनुमति लिन समस्या हुने गरेको पनि निखिलले बताए । कतिपय दृश्य नेपालमा छायांकन गर्न नपाएपछि भारत गएर खिच्नुपरेको उनको भनाइ छ ।
‘जुन चिजमा यहाँ अड्चन हुन्थ्यो, त्यहाँ चाहिँ त्यही चिज सजिलै भयो,’ उनले भने ।
फिल्म उद्योगलाई अन्य उद्योगसरह व्यवहार गरेर छायांकनका लागि आवश्यक सहजीकरण गर्न उनले सरकार र सम्बन्धित निकायलाई आग्रह गरे । फिल्म निर्माणबाट राज्यले करसमेत प्राप्त गर्ने भएकाले नेपाली फिल्मलाई आवश्यक स्थान, सुरक्षा र सुविधा उपलब्ध गराउने वातावरण बनाउनुपर्ने उनको भनाइ छ ।
‘आचार्य’ निर्माणका क्रममा नेपालमा एक्सन फिल्म छायांकन गर्दा सुरक्षा पूर्वाधारको अभाव र विभिन्न स्थानमा छायांकन अनुमति लिने प्रक्रियाले चुनौती थपेको निखिलले बताए ।
एक्सन दृश्यमा आफूले वास्तविक स्टन्ट गर्ने भएकाले पर्याप्त सुरक्षा पूर्वाधार नहुँदा जोखिम उठाउनुपर्ने अवस्था रहेको उनको भनाइ छ ।
‘यहाँ सेफ्टीको चिज छैन । अहिले पनि हामीले काम गर्दा ठूलो रिस्क उठाउनुपर्ने हुन्छ । म रियल स्टन्ट गरिरहेको हुन्छु,’ उनले भने ।
कलाकारलाई सामान्य चोट लाग्दा पनि त्यसले फिल्मको छायांकन तालिका र बजेटमा प्रत्यक्ष असर पार्ने उनले बताए ।
निखिलले ‘आचार्य’लाई आफ्नो करिअरकै प्राविधिक रूपमा महत्वाकांक्षी फिल्मका रूपमा प्रस्तुत गरेका छन् । फिल्ममा प्राविधिक पक्षलाई विशेष प्राथमिकता दिइएको उनले बताए ।
उनका अनुसार फिल्ममा एनामर्फिक लेन्स प्रयोग गरिएको छ । क्यामेरा वर्क, ब्लकिङ, स्टन्ट, ब्याकग्राउन्ड म्युजिक, साउन्ड इफेक्ट, एसएफएक्स तथा ग्राफिक्समा पनि विशेष ध्यान दिइएको छ ।
फिल्मको ब्याकग्राउन्ड म्युजिक, एसएफएक्सलगायत केही प्राविधिक काम भारतमा गरिएको उनले बताए । नेपाल र भारतमा छायांकन गरिएको फिल्ममा नेपालीसँगै भारतीय कलाकार पनि छन् । भारतीय बजारमा फिल्म बेच्ने उद्देश्यले मात्र नभई कथाको मागअनुसार भारतीय कलाकार चयन गरिएको उनको भनाइ छ ।
उनका अनुसार ‘आचार्य’को कथा नेपाली भए पनि यसको प्रस्तुतिलाई अन्तर्राष्ट्रिय स्तरमा पुर्याउने प्रयास गरिएको छ । नेपाली कथालाई नेपालीपनमै राखेर आधुनिक प्रविधि र फरक सिनेम्याटिक शैलीमार्फत दर्शकमाझ ल्याउने उद्देश्यले फिल्म निर्माण गरिएको उनले बताए ।
‘कथा हाम्रो हो, कथावस्तु यहीँबाट सुरु हुन्छ । तर यसको प्रस्तुति फरक हो,’ उनले भने ।
विदेशी फिल्मको प्रभाव घटाउन आगामी पुस्ताले पनि निरन्तर मेहनत गर्नुपर्ने उप्रेती बताउँछन् । यसका लागि नेपाली दर्शकले आफ्ना फिल्मप्रति माया र विश्वास देखाउनुपर्ने उनको भनाइ छ । तर दर्शकसँग माया माग्नुअघि फिल्मकर्मीले पनि माया गर्न लायक काम गर्नुपर्ने उनले बताए ।
‘दर्शकले माया गर्नु भनेर मात्रै हुँदैन । हामी मायाको लायक पनि हुनुपर्छ,’ उनले भने ।
‘सुरक्षाको कारण छ भने सुरक्षा के गर्दा हुन्छ, त्यो गर्नुपर्छ । तर यो पनि त उद्योग हो । हामी पनि ट्याक्स तिर्छौं,’ उनले भने । निखिल अभिनीत तथा निर्देशित फिल्म ‘आचार्य’ असोज ९ गते शुक्रबारदेखि प्रदर्शनमा आउँदै छ ।
