फिल्म ‘कोशोढुङ्गा’को पहिलो गीत सार्वजनिक भएको छ । ‘नत्र भने जिन्दगी व्यर्थ छ’ बोलको गीत सेभेन सिज इन्टरनेसनलको युट्युवबाट सार्वजनिक गरिएको हो । गीतमा नेत्र अर्यालको शब्द छ भने हुकलाइन खेम सेन्चुरीको छ । संगीतकार सेन्चुरीलाई गीतमा समीक्षा अधिकारी र दिपिका बयम्बु मगरले साथ दिएका छन् ।
गीत तीजको सेटअपमा छ । सिनेमाभित्र रहेको यो गीतले विवाहित र अविवाहितबीचको अन्तरबारे प्रष्ट पारेको छ । विवाहित हुँदाको राम्रो पक्ष र अविवाहितहरूले जीवनसाथी हुँदाको परिकल्पना र हुने उत्सुकता गीतमा समेटिएको छ । विवाहित र अविवाहित महिलाले तीनका गीतमा कसरी आफ्नो बह पोखेर रमाइलो गर्छन्, गीतमा देख्न सकिन्छ ।
गीतमा सुरक्षा पन्त र नीति शाहले अविवाहितको पक्षबाट आफ्नो परिकल्पना र उत्सुकता राखेका छन् । विवाहित हुँदाको प्रेम ऋचा शर्माले व्यक्त गरेकी छन् । आफू पनि अविवाहित भएकाले विवाह गर्ने भन्दै मन्जिल कुमार छन् । उनी सुरक्षाको पछि लागेका छन् । सुरक्षा पनि उनीप्रति सकारात्मक रहेको भिडियोमा देखिन्छ ।
तीजको यो गीत र भिडियो नेपाली तीज गीत र यसको परम्परालाई समेट्ने खालको छ । परम्परा पनि जोगाउँदै नाच्ने खालको गीत बनेको छ । डान्स गर्ने बिट र स्टेप रहेकाले आउँदा वर्षहरूका तीजमा पनि यो गीत बज्ने सम्भावना देखिएको छ ।
यस्तै, निर्माण पक्षले यो गीतमा टिकटक प्रितस्पर्धा समेत घोषणा गरेको छ । आजैदेखि खुल्ला गरिएको प्रितस्पर्धा अगस्ट २० सम्म सहभागीले भागलिन पाउनेछन् । टिमका अनुसार सहभागीले भाग लिदाँ ह्यास्ट्याग नत्र भने जिन्दगी व्यर्थ छ मेन्सन गर्नु पर्ने छ । यसमा बेस्ट पफमेन्सले ३० हजार, मोस्ट क्रियटिभ भिडियोले २० हजार र मोस्ट लाइक भिडियोले १० हजार पाउने छन् ।
सरोज पौडेलले निर्देशन गरेको फिल्म ‘कोशेढुङ्गा’ भदौ १२ गते रिलिज हुँदैछ । निर्देशक पौडेलले यस अगाडी फिल्म पूर्ण बहादुरको सारंगी निर्देशन गरेका थिए ।
