दीपक रौनियार निर्देशित गत चैत्र १ गतेबाट नेपालमा ‘राजागंज’ नाममा प्रदर्शनमा आएको सिनेमा ‘पूजा, सर’ फ्रान्सका ६२ वटा हलमा एकसाथ रिलिज भएको छ । बिहीबार निर्माण टिमले केही पोस्टर सार्वजनिक गर्दै अन्तर्राष्ट्रिय सिनेमाको केन्द्र मानिने फ्रान्समा यति ठूलो संख्यामा नेपाली सिनेमा पहिलो पटक रिलिज भएको हो ।
फ्रान्सेली वितरण कम्पनी एआरपी सेलेक्सनकी मिसेल हेलबर्स्टडले सिनेमाको कथा आकर्षक र अप्रत्याशित रहेको बताएकी छन् । ‘पूजा, सर’ एउटा यस्तो सिनेमा हो जसले हामीलाई यसको रहस्य, संस्कृति र दृश्यहरूमा सिधै लैजान्छ । यस अर्थमा यो सिनेमाको कथावस्तु अप्रत्याशित र आकर्षक छ । हामी फ्रान्सका दर्शकहरूलाई यो सिनेमा देखाउन गर्न पाउँदा खुसी छौं,’ फ्रान्सेली वितरक मिसेलले भनेकी छन् ।
निर्देशक रौनियार नेपाली सिनेमालाई विश्वप्रसिद्ध सिनेमा महोत्सवमा पुर्याउने पहिलो निर्देशक समेत हुन । उनले निर्देशक गरेको सिनेमा ‘हाइवे’ पहिलो पटक बर्लिन अन्तर्राष्ट्रिय सिनेमा महोत्सवमा २०१२ मा प्रदर्शन गरिएको थियो । त्यसअघि कुनैपनि नेपाली कथानक सिनेमा यो स्तरको अन्तर्राष्ट्रिय मञ्जमा उभिएको थिएन् । त्यसपछि उनले निर्देशन गरेको दोस्रो फिचर सिनेमा ‘ह्वाइट सन’ पनि विभिन्न विश्वप्रसिद्ध सिनेमा महोत्सवमा पुगेको थियो ।
निर्देशक रौनियार निर्देशित तेस्रो फिचर सिनेमा ‘पूजा, सर’ समेत विभिन्न विश्वप्रसिद्ध सिनेमा महोत्सवहरु अझै चहरिरहेको छ । यो सिनेमाको कार्यकारी निर्मातामा बलिउडका सफल निर्देशक अनुराग कश्यप जोडिएसँगै चर्चामा थियो ।
यो सिनेमाको वर्ल्ड प्रिमियर सन् २०२४ को भेनिस फिल्म फेस्टिभलमा भएको थियो । त्यसयता बुसान, सिड्नी, टालिन बाल्क नाईट्स, गोथेनबर्ग लगायतका महोत्सवमा प्रदर्शन भइसकेको छ । सिनेमाले नेदरल्याण्डमा ‘फ्रि टु बी मी’ अवार्ड जितेको छ । प्रमुख अभिनेत्री आशा मगरातीलाई फ्रिबर्ग अन्तर्राष्ट्रिय फिल्म महोत्सवले मुख्य प्रतिस्पर्धा खण्डको प्रमुख जुरीको रूपमा आमन्त्रण गरेको थियो ।
यो सोसल ड्रामा तथा एक्सन सिनेमामा आशा मगराती मुख्य भूमिका छिन् । सिनेमामा आशाका अलवा पूर्वमिस नेपाल निकिता चाण्डक, दयाहाङ राई, ऋचा शर्मा, विजय बराल, गौमाया गुरुङ, आरती मण्डल, घनश्याम मिश्र, परमेश्वर कुमार झा, पशुपति राई र नीरज श्रेष्ठको पनि अभिनय रहेको छ ।
सत्य घटनाबाट प्रेरित रहेको सिनेमाले नेपाल र भारतको सीमावर्ती शहरमा अपहरणमा परेका दुई बालकलाई मुक्त गराउन प्रहरीले चालेको खोजी अप्रेसनको कथा उठाएको छ । सिनेमाको निर्माणमा आदि फिल्मस्का तर्फबाट निर्देशक रौनियार र अभिनेत्री मगराती, बासुरी फिल्मस्का तर्फबाट रामबाबु गुरुङ र मनिराम पोखरेल, अभिनेता दयाहाङ राई तथा तन्हाउसर गेटका तर्फबाट एलन आर मिलिगनले सहकार्य गरेका छन् ।
