दर्शकमाझ लोकप्रिय ’कमेडी दरबार’ को तेस्रो सिजनमा नयाँ रानीको रुपमा अभिनेत्री दिया मास्केको आगमन भएको छ । शोमा महाराजाको रूपमा मनोज गजुरेल र महारानीको रूपमा गौरी मल्ल यथावत रहनेछन्।
त्यस्तै, यस सिजनमा निर्देशक श्रद्धा प्रसाईं विक्की अग्रवालले दिनेश काफ्ले, सन्तोष थापा र सुजन जिम्बालाई नयाँ कमेडियनका रूपमा प्रस्तुत गरेका छन् । यसपटक अझ भव्य सेट, नयाँ प्रस्तुति शैली र विविधतापूर्ण सामाग्रीसहित शो दर्शकमाझ आउन लागेको निर्माण पक्षले जनाएको छ । अघिल्ला सिजनका कलाकारहरू सीडी विजय अधिकारी, विश्वास तिम्सिना (बीटी कान्छा), सुन्दर खनाल, पवित्रा साँकी (मिस पबी), सुजाता श्रेष्ठ, पवन खतिवडा, खड्ग बहादुर पुन (खबपु) र विकास अर्याल पनि यथावत रहनेछन्।
बुधबार काठमाडौंमा पत्रकार सम्मेलनकामा निर्माण टिमले शोमा थपिएका नयाँ सदस्यबारे औपचारिक जानकारी दिइएको हो । लेखन टिममा विकास अर्याल र सरोज भण्डारी रहनेछन् भने कार्यक्रम सञ्चालन सजिना खनाल र विक्की अग्रवालले नै गर्नेछन् । शोको निर्देशन पनि विक्की अग्रवाल र श्रद्धा प्रसाईंले गर्नेछन्।
निर्माण टिमल यस सिजनमार्फत अझ परिष्कृत प्रस्तुति र उच्चस्तरीय मनोरञ्जन दिने लक्ष्य लिएको जनाएको छ । अघिल्ला सिजनमा जस्तै यस सिजनमा पनि फिल्म, गीत संगीतसँगै अझ फरक क्षेत्रका अतिथिहरूलाई पनि ल्याउने कोसिस रहने गेस्ट कोर्डिनेटर गोपीकृष्ण चापागाईंको भनाई छ ।
’कमेडी दरबार ३’ आगामी बैशाख ४ गतेदेखि हरेक शुक्रबार राति ९ बजे ओएसआर रियालिटी तथा प्राइम टाइम टेलिभिजनमार्फत प्रसारण हुनेछ ।
