भुवन केसी निर्देशित फिल्म ‘बाटुलो जून’को प्रदर्शन मिति तय भएको छ । फिल्म तिहारको भाइटीकाको भोलिपल्टदेखि देशव्यापी प्रदर्शनमा आउने भएको हो ।
सार्वजनिक पोस्टरमा अनमोल केसी र प्रिन्सी खतिवडा प्रेमिल मुद्रामा देखिएका छन् । अनमोलको लुक्सले ५० को दशकको झल्को दिन्छ । पृष्ठभूमिमा बलिरहेको लाल्टिन र आकाशमा चम्किरहेको जूनले उनीहरूबीचको आत्मीय सम्बन्धलाई संकेत गर्छ । पोस्टरले फिल्म ग्रामीण परिवेशमा आधारित प्रेमकथा रहेको संकेत गर्छ ।
निर्माण पक्षले बुधबार पोस्टर सार्वजनिक गर्दै फिल्म कात्तिक २६ (१२ नोभेम्बर) देखि प्रदर्शनमा आउने घोषणा गरेको हो । यसअघि दशैंमा प्रदर्शन गर्ने तयारी गरिए पनि उक्त समयमा प्रदर्शनमा आउने फिल्मको चाप बढेपछि नयाँ मिति तय गरिएको हो ।
नयाँ प्रदर्शन मिति घोषणा गर्दै निर्देशक केसीले भने, ‘दशैंमा अन्य फिल्म पनि प्रदर्शनमा आउने भएपछि पर्दा बाँडफाँटमा समस्या हुने देखियो । त्यसैले प्रदर्शक र वितरकको सुझावलाई मध्यनजर गर्दै नयाँ मितिमा फिल्म ल्याउने निर्णय गरेका हौं ।’
सामिप्यराज तिमिलसेना र सरिन पोखरेलको पटकथा रहेको फिल्ममा अनमोल र प्रिन्सीसँगै भुवन केसी, न्यान्सी खड्का, प्रकाश घिमिरे, रेअर राई, दीपक केसी, श्वेता मिश्र, लक्ष्मी गिरी, शारदा गिरी, लक्ष्मीनाथ तिमिल्सिना र शिशिर शिवाकोटीलगायतको अभिनय छ ।
सनराइज पिक्चर्सको ब्यानरमा निर्माण भएको फिल्मका निर्माता जिया केसी र भविष्य खड्का हुन् भने विवेक थापा सहनिर्माता हुन् ।
