फिल्म ‘गुन्यु चोलो : द ड्रेस’को थिम सङ सार्वजनिक भएको छ । फिल्मको भाव बोल्ने गीतमा लेखु सहयात्रीको रचना, समुन्द्र भट्ट र रेखा पन्तको शब्द, केतन क्षेत्रको स्वर रहेको छ भने बिशम आचार्यले पनि साथ दिएका छन्।
भावकु गीतले फरक लैंगिक पहिचानकै कारण मान्छेको दर्जा नपाउने गरेको कारुणिक यथार्थ समेटेको छ । तेस्रो लिंगीलाई मान्छेको रूपमा स्वीकार नगर्ने समाजको चित्रण गीतमा छ । एउटै आमाको कोखबाट जन्मिएको सन्तान तेस्रोलिंगी भएको थाहा पाएपछि फरक ग्रहबाट आएको झैँ गर्ने चलन रहेको समाजबारे उल्लेख गरिएको गीतमा तेस्रोलिंगीले मानवको रूपमा व्यवाहार गरिदिन गरेको संघर्ष छ।
‘गुन्यु चोलो : द ड्रेस’ भदौ १३ गते रिलिज हुँदैछ । समुन्द्र भट्टको निर्देशन रहेको चलचित्र ‘गुन्यु चोलो : द ड्रेस’ लैंगिक अल्पसंख्यक पारालैंगिक पात्रको कथामा बनेको छ । ‘गुन्यु चोलो : द ड्रेस’मा नाजिर हुसेनको मुख्य भूमिका छ । उनले पारालैंगिक महिला (ट्रान्सवुमन)को भूमिका निर्वाह गरेका छन्।
नाजिरसँगै चलचित्रमा सञ्चिता लुइँटेल, सुशील सिटौला, राजकुमार घोष, शिशिर राणा, अनुपम श्रेष्ठ र विशाल पहारीले पनि महत्वपूर्ण भूमिका निर्वाह गरेका छन् ।
