फिल्म ‘माइतीघर’ को शिर्ष गीत ११ दिन लगाएर छायांकन गरिएको छ। निर्माता रोहित अधिकारीले बाग्लुङमा नयाँ शैलीमा नै खिचिएको बताएका छन् । गीतको भिडियो खिच्नका लागि ५० लाख खर्च गरिएको समेत निर्माता अधिकारीको दाबी छ।
कविराज गहतराजको नृत्य निर्देशन रहेको गीतमा फिल्मका मुख्य कलाकारहरु उपासना सिंह ठकुरी र श्यामाश्री शेर्पा प्रस्तुत छन् । गीतको भिडियोमा कोरसको जम्बो टोलीलाई नचाइएको छ । यसकारण पनि लागत बढेको निर्माणपक्षको भनाई छ । रोहित अधिकारी फिल्मस्को व्यानरमा यो फिल्म निर्माण भएको हो ।
एउटा ऐतिहासिक गीत भएका कारण पनि भिडियो मेकिङमा कुनै संझौता नगरिएको निर्माताको दाबी छ । यो गीतको भिडियो आउँदो साता सार्वजनिक गर्ने तयारी गरिएको छ । निर्माणपक्षले यो गीतमा ४० सेकेन्डदेखि २ मिनेटसम्मको भिडियो बनाउने मध्ये एक जना उत्कृष्टलाई ५ लाख पुरस्कार दिने घोषणा समेत गरिसकेको छ । यो गीतमा भारतीय गायिका सञ्जिवनीको स्वर छ।
मिलन तामाङको निर्देशनमा तयार भएको यो फिल्ममा केदार प्रसाद घिमिरे, प्रकाश सपुत, धिरज मगर, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय छ।
चन्द्रकुमार दोङको कथा, रामशरण पाठकको पटकथा तथा संवाद रहेको फिल्ममा सुशन प्रजापतिको डीओपी, सुरेन्द्र पौडेलको सम्पादन छ । रविन शेरचन र धिरज तामाङको लगानी रहेको फिल्मका कार्यकारी निर्माता ईश्वर श्रेष्ठ र निरज कटुवाल हुन्।
